نعرف برشا ناس موجوعين و مقهورين ... نعرف فما ناس مظلومين ... نعرف فما ناس ناقصها 0،5 و تنجح ... و صدقوني لو ما كنتش عشت تجربتكم هذه قبل 4 سنين عمري ما كنت نهبطلكم الستاتي هذا ... خاطر كيما يقولوها ما يحس بالجمرة كان إلي يعفس عليها ! و بما أني دوبلت في الباك قبل باش نسمح لروحي باش نقلكم كلمتين :
ملخر و من غير مقدمات ... عندك زوز حلول :
الحل لول تقعد تشكي و تبكي و تقول أنا بهيم و أنا ما نفهمش و أنا ظلموني و انا باش نشوف فرمسيون ... و تتعقد و يولي الباك عقدة في حياتك و هذا حل ساهل علخر ...
الحل الثاني تعمل كيف عملت أنا 4 سنين لتالي !
دخلت لبيت سكرت على روحي ! بكيت بكيت ... و باعد قلت أنا علاش دوبلت ! خاطر ما قريتش من أول العام ؛ خاطر ما محرثتش من أول نهار ... فما ناس ما تقراش و تنجح الله غالب عندهم ذكاء... فما ناس لازم تمحرث باش تنجح ...
خذيت عهد بيني و بين روحي أنو العام الجاي ننجح برنسيبال و نفرح بابا و أمي ... و قريت من أول العام و محرثت دو فاسون كيف جاء آخر العام طيحت في الريتم و ليت نريفز بالشوي ... دخلت نعدي و ما ستنيتش ميساج الباك خاطر أصلا نعرف روحي ناجح ...فما ناس تحط في قلبها و تريفز ... فما ناس لا ... فما ناس فيبالهم كي تمحرث آخر العام باش تنجح لا وقتها انت و الزهر ... اما باش تنجح بنسبة 100٪ ريفز من أول نهار ...
أنا عطيتك زوز حلول و أنت أختار الحل إلي يرتحك
في الدنيا هذه ما تلوم على حد و ما تستنى شي من حد ... و إذا أنت اليوم لاقي أمك و بوك و خواتك ياقفو معاك إحمد ربي علي عطاك ... غيرك لا لاقي لا أم و لا بو و لا خو ...
قلتهالك قبل أغلب أصحابك بعد الباك معادش باش يبقاو أصحابك ... هذيكا الدنيا ... الحاجة الصادقة الوحيدة إلي نجم نعاونك بيها هي أني نقلك راك قوي و راك تنجم و راك أخزر لروحك من داخل تو تللاك أقوى مالدنيا الكل .. و إذا حد تخلى عليك بول عليه ... و إذا حد جرحك .. تدور تدور و ترجعلو منك و إلا من غيرك ... و راو أنت ما فرحتش السنا خاطر فرحتك تأجلت للعام الجاي ... و راو غمض عينك و كلها تلقى العام وفى ...
و إلي يعرف كيفاش يستغل وجيعتو و يقلبها قوة والله باش يتفاجئ العام الجاي كيف يقرى من أول العام و ينجح برنسيبال .. أصلا أنت توة فاهم شنوا معناها باك و فاهم إلي كل شي ينجم يطيح في الباك و فاهم الريق و الفاازات الكل ...
نحبك قوي ... و راجل ... و نحبك أنت مرا ... و نقلك ماكش خايب و ماكش بهيم ... آنشتاين دوبل و كمال الرياحي من أحس الكتاب في تونس دوبل في الباك ... و برشا برشا ...
عاود و خلي عندك الثيقة في روحك و ريفز من أول العام ... و ريفز بذكاء ... و صدقني تبع الكلام إلي قلتهولك ... تو العام الجاي تتفكرني .. و تذكر راك باهي و قوي و مستقبلك كبير ... و ما يبقى كان الحديث ... كل شي يتعدى و الحزن يولي فرحة و قوة ...و كان ماجاش فماش فشل راو ما إسمهاش دنيا ...
و نحب الناس إلي نجحو يشجعو صحابهم و كهو و كيف ما قتلك الحل بيديك
علاش ننصح فيكم ؟
خاطرني نهار إلي دوبلت لا لقيت لا صاحب لا حد لقيت امي و بابا الله يرحمو هزولي مورالي و قالولي راك تنجم. .. و تعدى عام و نجمت ... و اليوم نقلكم الكل راكم تنجمو
أي حد يحتاجني في نصيحة في حاجة يخليلي ميساج والله نجاوب الناس الكل
