كيف دوبلت العام لول ما بكيتش ! و ما وريت وجيعتي لحد بالرغم حسيتها عاللخر ... حسيتها في عين بابا و أمي إلي قالولي خيرها في غيرها .... حسيتها في صحابي إلي نجحو و معادش صحابي... حسيتها في الناس إلي شمتت فيا ... لكن ريتوه هذا الكل !!! ما يجي شي قدام إلي حسيتو أول نهار في حصة الفيزيك .... دخلنا نقراو ... قرينا ضرب الناقوز و البروف مازال يفسر في تجربة ... أنا لميت دبشي و خارج مزروب قلي وين ماشي ؟ قتلو خارج قلي و التجربة ؟ قتلو نعرفها قريتها عمناول ! قلي كان جيت قريتها راك #مادوبلتش... و إطرشق كلاس كامل بالظحك ... ضحك متاع إستهزاء و حڨرة .... تبسمتلهم و خرجت ... أنا مانيش مالناس إلي يورو وجيعتهم... أما وقتها تمنيت الأرض تبلعني و نموت .... مانيش مالنوع إلي يقبل الإهانة ...
يمكن كان ما ضحكوش عليا نهارتها راني ما نجحتش و إلا راني نجحت ب 11 معدل كان طارت ... يمكن ربي عملي سبب باش نحط في قلبي و نمحرث عام كامل و ننجح لول متاع الليسي في شعبة الإعلامية.. كلها أسباب ... العام لول ما قريتش ... موش ما قريتش تي ما نعرفش أسامي الدروس أصل ...
نحب نقلكم ما تخافوش ... تمنى الخير تلقى الخير ... و تحملو مسؤوليتكم ... و كونو رجال و نساء واعين ... ما تقعدش تهلوس ! ننجح ما ننجحش ؟ أنت عديت ... كان حاس روحك كنترول ابدى ريفز و إربح الوقت ... كان عارف روحك ناجح كهو ...
الدنيا تجارب ... ريتو توا أكثر طموح تحلمو بيه تاخذو الباك .... صدقني بعد 5 سنين تتلفت وراك و تضحك على خوفك ... تقول علاش انا نخاف ! إلي كاتبو ربي يصير ...
نقلكم شنوا علمني الباك ! علمني أنو ربي عادل .... يعني أول عام في الباك كنت نصلي أما ما قريتش .... و ما نجتش ... العام الثاني ما نصليش و قريت و محرثت و ربي نجحني... خاطر ربي عادل ! ينجحك كيف تقرا على روحك و تاخذ بالأسباب ... موش عام كامل راقد و تجي تو تقلو نجحني ... نهنيك ربي باش ينجح إلي تعب ..
أما هذا ما يمنعش انو الباك فيه هامش متع زهر ... تزهر معاك في دفوار و الا زوز تبدا معمل على 7 تلقى 12 و إلا أكثر ....
موش باش نقلك ما تخممش في النتيجة نعرف إنك موش باش تنجم ! أما إلي نقولو لهي روحك بأي حاجة ... أفلام ... سيريات .... تفرج في كاس العالم ...... و خليها كان ربي كاتبها تو تجي انت قريت و تعبت و سهرت كهو تو حصل ما في الصدور .
هاني أنا طحت كنترول و دوبلت ... و نجحت و قريت و تخرجت و خدمت .... و توة مرتاح نستنى في دبلوم الماستار ماشي حذا خويا لبرا ...
و صدقني تخمم و إلا تحرق أعصابك .. تصلي ... تكفر ... تطير ... تنتحر .... النتيجة راي محسومة و حاضرة .... و تذكرديما ربي عادل
