النقلة هي الطالب يبدل من فاك لفاك أخرى في نفس الشعبة أو الإختصاص أو لإختصاص مشابه... يعني نفس الشعبة و حتى كان موش نفس الإختصاص زادة نرمال...لكن نفس الشعبة .
_________
-من يقوم بالنقلة؟؟؟؟؟
أي طالب عندو ظروف إجتماعية أو صحية و يحب يعمل نقلة باش يقرب لمقر السكنى متاعو هو ينجم يعمل نقلة أو طالب عندو ظروف أو مشاكل في الفاك ليقرى فاها باش يبدل أو زادة طالب يحب يقرى في فاك أخرى المستوى فاها يكون خير لأنو شاف روحو المستوى متاعو خير.... أو لغيرها من الأسباب .
______________
-متى تجرى النقلة؟؟؟؟؟؟؟
النقلة تصير ما بين آخر جوان حتى آخر جويلية و كل جامعة و الأوقات متاعها .....
______________
-كيفاه نعمل نقلة؟؟؟؟؟؟؟؟
النقلة تصير عن طريق تصب الملف متاعك في الجامعة ...
مثال: إنت حاشتك باش تنقل ل ISG تونس ، دونك نصب الملف في جامعة تونس ....
يعني تعمل dossier فيه الأوراق الازمة و تبعثو للجامعة عن طريق بريد مضمون الوصول.. و تنجم تعمل العديد من الملفات.. يعني تيعث لجامعة تونس و واحد لجامعة قرطاج و واحد منار إلخ...
_______________
-كيفاه تعمل الملف هذا
ما بين آخر جوان و آول جويلية كل جامعة (جامعة المنار، جامعة تونس٫ جامعة قرطاج إلخ...) تهبط إعلانات... تقوم بالتسجيل سوى عن بعد أو تقوم يتحميل وثيقة التسجيل و تحضر الآوراق الازمة و تبعث لجامعة بالبريد مضمون الوصول .
نسخة من كشوف الأعداد المتحصل عليها خلال الدراسات الجامعية
نسخة من آخر ترسيم جامعي
نسخة من بطاقة التعريف الوطنية
ظرفان خالصا المعلوم البريد يحملان عنوان المترشح و الترقيم البريدي
برنامج الدراسات بالمؤسسة الأصلية بالنسبة للنقل الخاصة بالطب, الصيدلة و طب الأسنان في صورة توفره.
-الأوراق_الإجتماعية :
بطاقة علاج مجاني
بطاقة علاج ذات تعريفة منخفضة
بطاقة إعاقة
مضمون وفاة أحد الوالدين
نسخة من حكم طلاق الوالدين
شهادة تثبت إصابة أحد الوالدين بمرض مزمن
بطاقات أعداد الأخوة التلاميذ
شهائد الترسيم للأخوة الطلبة
شهادة في الخصم من المورد
شهادة بيانية في الأجر
ما يثبت عمل أحد الوالدين بالخارج
عقد زواج و شهادة عمل أحد القرينين للتقريب بين الأزواج
وثيقة رسمية تثبت أن المعني بالأمر أحد جرحى أو شهداء الثورة
أية وثيقة أخرى من شأنها إثبات الحالة الإجتماعية
شهادة إقامة
-الأوراق_الصحية :
أي وثيقة أو ملف صحي تثبت أن الطالب يعاني من مرض مزمن أو مرض يطلب العناية أو مرض نفسي أو مرض خطير أو مرض منذ مدة إلخ من الوثائق الصحية....
-أوراق_أخرى :
أي ورقة أخرى مثال بوك مريض أو تعمل مطلب مكتوب باليد يصححلك فيه العمدة تدل على أنكم تعانيو ظروف صعبة أو أنك مشارك في جمعية رياضية أو خيرية أو أنك تخدم باش تعاون عايلتك إلخ.... هذا الكل تنجم تحطو.
ملاحضة:
الأوراق خاصة الطبية ماذبيك تعملها من تو لأنو كي يشوفوك عامل شهادة طبية في جويلية يقلك معناها هذا بلعاني عمل يحب ينقل.
الإختيار يصير حسب الملف.. يعني كيف يكون الملف مدعوم بالوثائق يكون عندو نسبة كبيرة في القبول، و زادة تدخل فاها حسابات أخرى هي البلايص الموجودة في المعهد إلي تخب تمشيلوا.. زادة مش واحد يبدى ناجح بالإسعاف فالباك و مدويل فالسنة أولى جامعة فالفاك متاعو يحب يمشي لل IHEC
لهنا الفاك تقلك ما يساعدنيش نطيح في مستوى المعهد متاعي .. دونك فما شوية لوجيك فالحكاية و ينجم واحد يكون مدوبل و ينقل لكن كي يبدا ناجح تكون فرص القبول متاعو أكبر، نفس الشي كي يبدا عامل سنة بيضاء ، و فما جامعات تقلك لازم يكون ناجح باش نقبلك لكن نرمال صب تنجم تخطفلك .
و النقلة هي زادة تكون فيها أكثر فرصة كيف حد باش يقرب لمقر السكنة متاعو.... ما فماش حاجة مضمونة فالنقلة لكن فما شوية منطق، قوة الوثائق و الحجج إلي عندك ، زهر.... هاذم الكل عوامل تخليك تتقبل لكن هي محاولة و إنت حاول أعمل نقلة في حاجة تكون حظوظك فيها أوفر.
توضيحات
**كي نعمل نقلة نتعدى سنة ثانية و كان مدوبل كيفاه ؟؟؟؟
-أي طالب عمل نقلة و هو ناجح فالمعهد متاعو يتعدى سنة ثانية بالطبع لكن كان مدوبل يعاود سنة أولى و يتقيد مدوبل و كان عندو مواد ههاززهم و يبداو نفس المواد ليقراهم فالفاك الجديدة هوما نفسهم فالفاك لقديمة ما يعاودهمش.....
________________
***آنا عملت إعادة توجيه في مارس السنة و نجحت نعمل نقلة؟؟
-لا... العام الجاي تعمل بعد ما تقرا عام ساعة
_________________
***نجم نقل و آنا مدوبل أو موش عامل سنة بيضاء؟؟؟؟؟؟
-إي تنجم... أما لومان ناجح حضوضك أوفر
_________________
***نجم نعمل برشا مطالب متاع نقل؟؟؟؟؟
-أكيد... قد ما تحب
_________________
***نجم نعمل نقلة و تغيير مسار في نفس الوقت ؟؟؟؟
-نعم تتجم...لكن صعيب شوية القبول
_________________
***عندي الحق في بورص و مبيت؟؟؟؟
-إحسب روحك قعدت في نفس الفاك متاعك دونك كانك مدوبل معندكش الحق في البورص و كان ناجح إي... و المبيت كانك طفل تعمل إسعاف بالسكن حتى كان مخذيتش حتى مرة و الطفلة كان عامها الثاني تعمل تجديد سكن و كان الثالث تعمل إسعاف.
النتائج تهبط مخر برشا.. آخر أوت أو أول سبتمبر و حتى بعد ما ترجع تقرى... دونك أي واحد باش يقدم مطلب يقعد ما يعملش تسجيل حتى لآخر لحضة يشوف النتيجة و بعد كيف يقبلوه يعمل إجراءات الترسيم و يمشي لديوان الخدمات من أجل مطلب المبيت و البورص.
إ سال الملفات يكون بالبريد المضمون الوصول إلى الجامعة أو تهزو مباشرة و في الآجال المحددة في الإعلانات كما تنجم تبث نفس الملف للفاك لكن حتى الجامعة تكفي.
**و تنساش تكتب على الجواب مطلب نقلة جامعية **
--ملاحضة بالنسبة للوثائق :
من جملة الوثائق بطاقة أعداد سنة أولى في الفاك... إلي عمل سحب ترسيم عندو وثيقة سحب الترسيم و إلي معملش عندو بطاقة أعداد و تنجم تكون فيها أسفار إذا إنت ما تمشيش تقرى لكن إنت عندك منها و فما بعض الفاكات إلي تعطي بطاقة الأعداد مخر .. و حتى آخر الصيف دونك إنت تحرص علاها خاطر لازمة و كان شفت آخر أجل متع إرسال الملف قريب يوفا و مازلت متحصلتش علاها أبعث منغيرها و إكتب فالملف إلي الفاك مزالت مبعثتش بعد لحقها وحدها.
